مولانا طارق جمیل پاکستان کی ایک ایسی شخصیت ہیں جن کا مختلف فرقوں اور مذاہب کے افراد انتہائی احترام کرتے ہیں اور نہ صرف ملک میں بلکہ بیرونی ممالک میں بھی ان کے چاہنے والوں کی ایک بڑی تعداد موجود ہے۔

گزشتہ دنوں وہ حافظ احمد کے پوڈ کاسٹ کے مہمان تھے اور اس گفتگو کے دوران انہوں نے اپنی زندگی کے بارے میں کچھ حقائق شیئر کیے۔

انہوں نے بتایا کہ انہوں نے اپنے والدین سے کبھی بھی دوسرے بچوں کی طرح محبت نہیں کی اور وہ اب بھی اپنے دل میں ان کے لیے اس طرح کی محبت محسوس نہیں کرتے۔

مولانا طارق جمیل نے بتایا کہ وہ صرف 11 برس کی عمر میں ہی حصول تعلیم کے سلسلے میں ہاسٹل بھیج دیے گئے تھے اور اس طرح وہ اپنے والدین کے ساتھ اس طرح کا لگاؤ ​​پیدا نہیں کرسکے جیسا دوسرے بچوں کا اپنے والدین کے ساتھ ہوتا ہے۔

اپنے تجربے کی روشنی میں مولانا طارق جمیل نے والدین کو مشورہ دیا کہ وہ اپنے بچوں کو چھوٹی عمر میں خود سے دور نہ بھیجیں کیوں کہ اس طرح ان کے بچے ان کے ساتھ وہ قربت کبھی محسوس نہیں کرسکیں گے جس طرح دوسرے بچے کرتے ہیں۔