قومی کرکٹ ٹیم کے سابق کپتان شاہد آفریدی کی صاحبزادی اقصیٰ آفریدی کی شادی سوشل میڈیا پر تاحال دلچسپی کا باعث ہے۔ لالا نے بیٹی کے ساتھ دلکش تصاویر شیئرکی تھیں جنہیں بےحد سراہتے ہوئے بیشترصارفین نے اس تجسس کا بھی اظہار کیا کہ اقصیٰ کا شاہانہ عروسی جوڑا کس ڈیزائنرکا تیار کردہ ہے۔

شاہدآفریدی بیٹیوں کی تصاویر منظرعام پر لانا پسند نہیں کرتے ،اسی وجہ سے ان کی جانب سے شیئرکی جانے والی تصاویرمیں اقصیٰ کا چہرہ نمایاں نہیں تھا۔

اقصیٰ نے زندگی کے اس اہم ترین موقع پر دونوں تقریبات کے لیے پاکستان کی مقبول اور مہنگی ترین فیشن برانڈ ’ری پبلک‘ کے تیار کردہ ملبوسات پہنے جو ’ریپبلک ویمنزویئر‘ کی برائیڈل کلیکشن سے چُنے گئے۔

دونوں دن دُلہن کا میک اپ فرقان سیلون نے کیا جنہوں نے آفیشل انسٹاگرام پیج پراس حوالے سے تفصیلات شیئرکیں۔

بارات کے لیے سُرخ جگمگاتے لہنگے پر سنہری کڑھائی کا انتخاب کرنے والی اقصیٰ نے ولیمے پربےحد خوبصورت ڈائمنٹیز سے سجا سُرمئی گاؤن زیب تن کیا جس کے دوپٹے کے پلو دونوں اطراف سے ایسے ڈھلکے ہوئے تھے کہ فرشی شرارے کے ساتھ پلو بھی زمین پر پھیلے نظر آئے۔

اگرچہ آفیشل ویب سائٹ پر ان ملبوسات کی تصاویر موجود ہیں تاہم قیمت نہیں بتائی گئی۔

ہماری حاصل کردہ معلومات کے مطابق اقصیٰ کے عروسی جوڑے کی قیمت تقریباً ساڑھے 7 لاکھ پاکستانی روپے ہے۔

بات کی جائے ولیمے کے جوڑے کی تو انوکھی چھب دکھاتے اس لہنگے کی قیمت ساڑھے 8 لاکھ روپے بتائی گئی ہے۔

اقصیٰ کا نکاح ناصر نصیر سے دسمبر 2022 میں ہوا تھا۔ رخصتی کی تقریب 7 جولائی کو کراچی کے علاقے ڈیفنس کے مقامی ہال میں ہوئی۔

تقریب میں تربیتی کیلئے کراچی میں پہلے سے موجود کپتان بابراعظم، محمد رضوان، امام الحق، شان مسعود، سرفراز احمد، حسن علی، عامر جمال اور اعظم خان سمیت دیگر نے شرکت کی۔ اس کے علاوہ معین خان، ارشد خان، محمد اکرم اور وقار یونس بھی مہمانوں میں شامل تھے۔