اسلام آباد میں ایل این جی ریفرنس کی سماعت میں پیشی کے بعد سابق وزیراعظم شاہد خاقان عباسی کی ایک دلچسپ ویڈیو سوشل میڈیا پر وائرل ہے۔

سماعت کے بعد روانگی کیلئے گاڑی ڈرائیو کرنے والے شاہد خاقان عباسی سے صحافی نے سوال کیا کہ وہ کہاں جارہے ہیں؟۔

اس پر شاہد خاقان عباسی نے شگفتہ اندازمیں جواب دیا، ’ یاربالٹی گھر رہ گئی ہے وہ لینے جا رہا ہوں’۔

سابق وزیراعظم کا یہ جملہ درحقیقت چیئرمین پی ٹی آئی عمران خان پر طنز تھا جو گزشتہ دنوں مختلف سماعتوں میں شدید حفاظتی حصار میں پیش ہوتے رہے، اس دوران وہ اپنے منہ کو بھی ڈھک کر عدالت میں جاتے تھے۔

واضح رہے کہ ایل این جی ریفرنس کا 26 جون کو محفوظ شدہ فیصلہ 18 جولائی کو سنایا جائے گا۔ احتساب عدالت کے جج محمد بشیر کے مطابق فیصلہ مکمل تحریرنہیں کیا جاسکا، اس کیلئے وقت درکارہے۔

عدالت نے کیس کی سماعت 18 جولائی تک ملتوی کردی ۔

واضح رہے کہ 26 جون کو احتساب عدالت نے دائرہ اختیارسے متعلق فیصلہ محفوظ کیا تھا۔