اسپیکر قومی اسمبلی راجا پرویز اشرف کا کہنا تھا کہ موجودہ اتحادی حکومت نے مشکلات کے باوجود عوام دوست بجٹ پیش کیا ہے، جب کہ مولانا فضل الرحمان کا کہنا ہے کہ ملک کو بحرانوں سے نکالنے کے لیے پارلیمان کا کردار کلیدی اہمیت کا حامل ہے۔

جمعیت علمائے اسلام ف کے سربراہ مولانا فضل الرحمان نے اسپیکر قومی اسمبلی راجہ پرویز اشرف کے گھر جاکر ملاقات کی۔ ملاقات میں وفاقی وزیر برائے مواصلات مولانا اسعد محمود، خرم پرویز راجہ اور شاہ رخ راجہ بھی موجود تھے۔

ملاقات میں اہم سیاسی اور معاشی امور پر تبادلہ خیال کیا گیا، جب کہ مولانا فضل الرحمان نے اسپیکر قومی اسمبلی سے گزشتہ دنوں پیش آنے والے حادثے سے متعلق خیریت دریافت کی۔

اسپیکر قومی اسمبلی راجا پرویز اشرف کا کہنا تھا کہ موجودہ اتحادی حکومت نے مشکلات کے باوجود عوام دوست بجٹ پیش کیا ہے، سابق حکومت نے ملک کو بحرانوں سے دو چار کیا۔

مولانا فضل الرحمان نے ایوان کی کارروائی خوش اسلوبی سے چلانے پر اسپیکر قومی اسمبلی کے کردار کو سراہتے ہوئے کہا کہ ملک کو بحرانوں سے نکالنے کے لیے پارلیمان کا کردار کلیدی اہمیت کا حامل ہے، موجودہ حکومت نے ملک میں معاشی استحکام لانے کے لیے اہم کردار ادا کیا ہے۔