مقبوضہ مغربی کنارے میں واقع جنین کے پناہ گزین کیمپ میں دو روز بعد اسرائیل کا بڑا فوجی آپریشن ختم ہوچکا ہے، علاقے سے اسرائیلی فوجیوں کا انخلا مکمل ہوگیا ہے۔

جنین شہر میں ہر طرف تباہی کے مناظر دیکھے جا سکتے ہیں، چہارسو تباہ شدہ عمارتیں، گاڑیاں اور ٹوٹی پھوٹی سڑکیں اسرائیلی فورسز کی وحشیانہ کارروائیوں کی روداد سنا رہی ہیں۔

اسرائیلی فورسز کے ہاتھوں شہید ہونے والے فلسطینیوں کی تدفین کردی گئی ہے،جن کی نماز جنازہ میں ہزاروں افراد نے شرکت کی۔

اسرائیل نے جنین پر بمباری کی اور ڈرون حملے کیے، بلڈوزر سے مکانات گرا کر تباہی پھیلائی، تین ہزار افراد بے گھر ہوئے، مساجد کے دروازوں پر ملبہ ڈال دیا گیا۔

اسرائیلی حملوں میں بارہ فلسطینی شہید اور سو سے زائد زخمی ہوئے۔

دوسری جانب وائٹ ہاؤس کا کہنا ہے کہ حالیہ آپریشن پر اسرائیلی حکام کے ساتھ رابطے میں ہیں۔

وائٹ ہاؤس نے مطالبہ کیا ہے کہ اسرائیل جنین میں فلسطینیوں کے لیے بنیادی ڈھانچہ کو بحال کرے۔