لاہور ہائیکورٹ نے صحافی عمران ریاض کی بازیابی کے لیے اُن کے والد کی درخواست پر سماعت 25 جولائی تک ملتوی کردی۔

چیف جسٹس لاہور ہائیکورٹ جسٹس محمد امیر بھٹی نے صحافی کے والد ریاض احمد کی درخواست پر سماعت کی تو ایڈیشنل آئی جی پنجاب سمیت دیگر افسر پیش ہوئے۔

درخواست گزار کے وکیل نے بتایا کہ عمران ریاض کی بازیابی کے لیے ورکنگ کمیٹی کے ساتھ اچھی میٹنگز ہوئیں ہیں اور امید ہے جلد اچھے نتائج ملیں گے۔

میاں علی اشفاق ایڈووکیٹ نے بتایا کہ ورکنگ کمیٹی کی میٹینگز میں شواہد سمیت دیگر چیزیں فراہم کیں ہیں لیکن انتظامی سطح پر کچھ رکاوٹیں ہیں جن کو دور کرنے کی ضرورت ہے۔

سرکاری وکیل نے بتایا کہ اطلاع کے مطابق تو کوئی رکاوٹ نہیں ہے۔

عدالت نے انتظامی سطح پر رکاوٹیں ختم کرنے کے لیے 20 دنوں کی مہلت دیتے ہوئے سماعت 25 جولائی تک ملتوی کردی۔