الیکشن کمیشن نے قومی اور صوبائی اسمبلیوں کے انتخابات کے لئے اہل سیاسی جماعتوں سے انتخابی نشانات حاصل کرنے کےلئے درخواستیں مانگ لی ہیں۔

ترجمان الیکشن کمیشن کے مطابق مختص کئے گئے انتخابی نشانات میں سے کسی ایک انتخابی نشان کے حصول کے لئے پارٹی سربراہ کی دستخط شدہ درخواستیں 19 جولائی تک جمع کروائی جائیں۔

پنجاب اور خیبرپختونخوا الیکشن کے لئے پہلے سے درخواست جمع کروانے والی سیاسی پارٹیوں کو بھی دوبارہ درخواستیں دینے کی ہدایت کی گئی ہے۔

انتخابات نشانات کی ترجیحی لسٹ، پارٹی ہیڈ آفس کا پتہ اور حلف نامہ بھی درخواست کے ساتھ منسلک کرنے کی ہدایت کی گئی ہے۔

موصول درخواستوں پر سیاسی جماعتوں کی اہلیت الیکشن ایکٹ کے تحت پرکھی جائے گی۔

الیکشن کمیشن نے واضح کیا ہے کہ نامکمل، فیکس کے زریعے موصول اور مقررہ تاریخ کے بعد ملنے والی درخواستوں پر غور نہیں کیا جائے گا۔