پنجاب میں دل کےعارضے میں مبتلا مریضوں کے لیے درد ناک خبر سامنے آگئی، صوبے کے پرائیوٹ اسپتالوں میں صحت کارڈ پر دل کے مریضوں کا آپریشن بند کردیا گیا۔

اسٹیٹ لائف انشورنس کمپنی کی جانب سے مراسلہ جاری کیا گیا ہے، جس کے مطابق پنجاب حکومت کی جانب سے واجبات کی مکمل ادائیگی تک دل کے مریضوں کے لیے پرائیویٹ اسپتالوں میں بائی پاس سمیت دیگر آپریشنز کی سہولت بند کردی۔

مراسلے کے مطابق مریضوں کو اب سے پرائیویٹ اسپتالوں میں کارڈیک سرجری اور کارڈیالوجی کی خدمات حاصل کرنے کے لیے مکمل رقم کا 30 فیصد ادا کرنا ہوگا۔

مراسلے کے مطابق صرف پنجاب کے رہائشیوں کو فری علاج سے محروم کیا گیا جبکہ اسلام آباد سمیت دیگر صوبوں کا صحت کارڈ پر علاج معالجہ مفت ہی ہوگا۔

پنجاب حکومت کی صحت کارڈ کی سہولیات ختم کرنے کی تردید

دوسری جانب نگراں صوبائی وزیر صحت پنجاب ڈاکٹر جاوید اکرم نے اسپتالوں میں صحت کارڈ پر کارڈیالوجی کی سہولیات ختم کرنے کے حوالے سے چلنے والی خبروں کی تردید کردی۔

ڈاکٹر جاوید اکرم کا کہنا ہے کہ پنجاب کے تمام سرکاری اسپتالوں میں صحت کارڈ کے ذریعے کارڈیالوجی کی سہولیات بلا تعطل جاری رہیں گی، حکومت پنجاب اسٹیٹ لائف انشورنس کمپنی کے ساتھ نیا معاہدہ کرنے جا رہی ہے۔

نگراں صوبائی وزیر صحت پنجاب نے مزید کہا کہ پنجاب کی عوام کو صحت کارڈ کے ذریعے مزید سہولیات فراہم کرنے کے لیے بہتری لا رہے ہیں، صحت کارڈ نہ بند کررہے ہیں اور نہ ہی کارڈیالوجی کی سہولیات کو محدود کر رہے ہیں، صحت کارڈ کے ثمرات اصل حق داروں تک پہنچانا چاہتے ہیں۔