پاکستان اور بھارت کے درمیان معاہدے کے تحت قیدیوں کی فہرستوں کا تبادلہ ہوا ہے، پاکستان نے بھارتی حکومت پر سزا پوری کرنے والے پاکستانیوں کو رہا کرنے پر زور دیا ہے۔

ترجمان دفتر خارجہ کا کہنا ہے فہرست کے مطابق اس وقت بھارتی جیلوں میں 417 پاکستانی قیدی موجود ہیں، بھارتی حکام کو جو فہرست دی گئی ہے اس میں بھارتی جیلوں میں قید 343 شہری اور 74 ماہی گیر کا ذکر ہے۔

حکومت پاکستان نے 308 بھارتی قیدیوں کی فہرست بھی بھارتی ہائی کمیشن کے حوالے کی ہے، 42 سویلین قیدی اور 266 ماہی گیروں کی فہرست بھارتی حکام کے حوالے کی گئی۔

ترجمان دفتر خارجہ کے مطابق بھارتی حکومت پر زور دیا گیا ہے کہ وہ سزا پوری کرنے والے پاکستانیوں کو رہا کر کے وطن واپس بھیجے، پاکستان اور بھارت ہر سال یکم جنوری اور یکم جولائی کو قیدیوں کی فہرستوں کا تبادلہ کرتے ہیں۔

قیدیوں کی فہرست کا تبادلہ قونصلر رسائی کے معاہدے کے تحت ہوتا ہے جس پر 21 مئی 2008 کو دستخط ہوئے تھے۔