خیبرپختونخوا کے شہر بنوں میں مدرسے کی چھت گرنے سے 3 بچے جاں بحق اور 2 بچے زخمی ہو گئے جبکہ لاہور میں مکان کی چھت منہدم ہونے سے 2 افراد جان سے گئے اور چار زخمی ہوگئے۔

تحصیل ڈومیل میں نالہ کاشو پل کے قریب دینی مدرسے کی چھت گرنے کے بعد ریسکیو 1122 کی ٹیم اور علاقہ مکینوں نے امدادی سرگرمیاں انجام دیں۔ ملبے تلے دب کر زخمی ہونے والے بچوں کو خلیفہ گل نواز اسپتال بنوں منتقل کیا گیا۔

اسسٹنٹ کمشنر بنوں سید ابرار علی شاہ نے موقع پر پہنچ کر امدادی کاموں کی نگرانی کی۔ بتایا جا رہا ہے کہ گزشتہ کچھ دنوں پہلے بنوں میں آنے والے طوفان کی وجہ سے مدرسے کی چھت میں دراڑیں پڑ گئی تھیں۔

لاہور میں چھت گر گئی

لاہور کے علاقے مناواں میں مکان کی چھت گرنے سے 2 افراد جان سے گئے اور 4 زخمی ہوگئے۔ ریسکیو ورکرز نے زخمیوں کو طبی امداد کے لیے اسپتال منتقل کیا۔