داسو ہائیڈرو پاور پروجیکٹ کے کنکریٹ اسٹارٹر ڈیم کا پہلا مرحلہ ہائی فلو سیزن سے قبل ہی مکمل کر لیا گیا۔

داسو ہائیڈرو پاور پروجیکٹ پر ایک اور اہم پیشرفت سامنے آئی ہے، پروجیکٹ کے کنکریٹ اسٹارٹر ڈیم کا پہلا مرحلہ ہائی فلو سیزن سے قبل مکمل کر لیا گیا ہے۔

ترجمان واپڈا کا کہنا ہے کہ ڈیزائن کے مطابق داسو پروجیکٹ کا کنکریٹ اسٹارٹر ڈیم دو مختلف مراحل میں مکمل ہوگا، پہلے مرحلے میں اسٹارٹر ڈیم کی سطح سمندر سے بلندی 785 میٹر ہے، دوسرے مرحلے میں ڈیم کی بلندی 798 میٹر ہو گی۔

ترجمان واپڈا نے بتایا کہ دریائے سندھ کا پانی داسو ہائیڈرو پاور پروجیکٹ کی دو ڈائی ورشن ٹنلز سے گزر رہا ہے، ڈیزائن کے مطابق دریائے سندھ کا کچھ پانی کنکریٹ اسٹارٹر ڈیم کے اوپر سے بھی بہہ رہا ہے۔

ترجمان کے مطابق اکتوبر میں اسٹارٹر ڈیم کا دوسرا مرحلہ شروع ہوگا، ڈیم کے دوسرے مرحلے کی تکمیل آئندہ لو فلو سیزن میں شیڈول ہے۔