استحکام پاکستان پارٹی کی جانب سے بڑا فیصلہ سامنے آیا ہے، پارٹی کے صدر علیم خان نے نعمان لنگڑیال اورعون چوہدری کو وفاقی کابینہ سے مستعفی ہونے کی ہدایت کردی۔

سماجی رابطے کی ویب سائٹ ٹوئٹر پر استحکام پاکستان پارٹی کی مرکزی سیکرٹری اطلاعات فردوس عاشق اعوان نے کہا ہے کہ استحکام پاکستان پارٹی کے صدر علیم خان نے وفاقی کابینہ میں موجود نعمان لنگڑیال اور عون چوہدری کو وفاقی کابینہ سے فوری مستعفی ہونے کی ہدایات جاری کردیں۔

انہوں نے کہا کہ دونوں عہدیداران استحکام پاکستان پارٹی کے وجود میں آنے سے قبل ان عہدوں پر تعینات تھے۔

فردوس عاشق اعوان نے مزید کہا کہ استحکام پاکستان پارٹی اپنی انفرادی آزادانہ حیثیت کو برقرار رکھتے ہوئے آنے والے الیکشن میں حصہ لے گی۔

ان کا کہنا تھا کہ عوام کی مشکلات کے ازالے، ملکی مفاد اور عوام میں نچلی سطح تک رسائی کے لیے پارٹی کا تنظیمی ڈھانچہ جلد تشکیل دیا جائے گا۔

واضح رہے کہ عون چوہدری اور نعمان لنگڑیال کو استحکام پاکستان پارٹی کے وجود میں آنے سے پہلے وزیراعظم شہباز شریف کا معاون خصوصی مقرر کیا گیا تھا۔