سینیئر وکیل عبدالرزاق شر قتل کیس میں چیئرمین تحریک انصاف (پی ٹی آئی) کی گرفتاری کے وارنٹ جاری کردیئے گئے۔

کوئٹہ کی انسداد دہشت گردی عدالت (ون) نے ایڈووکیٹ عبدالرزاق شر قتل کیس میں چیئرمین تحریک انصاف کے وارنٹ گرفتاری جاری کردیے ہیں، جبکہ تحریک انصاف کے وکلاء نے وارنٹ گرفتاری بلوچستان ہائیکورٹ میں چیلنج کردیا۔

بلوچستان ہائیکورٹ کے چیف جسٹس نعیم افغان اور جسٹس عامر رانا نے درخواست کی سماعت کی، پی ٹی آئی کے وکیل سید اقبال شاہ ایڈووکیٹ نے کہا کہ چیئرمین تحریک انصاف نے پہلے ہی اسلام آباد ہائیکورٹ سے قبل از گرفتاری ضمانت حاصل کررکھی ہے۔

پی ٹی آئی وکلاء کے مطابق چیئرمین تحریک انصاف کے خلاف جاری وارنٹ گرفتاری فوری منسوخ کیا جائے، لیکن بلوچستان ہائیکورٹ نے تحریک انصاف کی جانب سے دائر درخواست خارج کردی۔

بلوچستان ہائیکورٹ نے ریمارکس دیئے کہ عبدالرزاق شر ایڈووکیٹ قتل کی تفتیش کا سلسلہ جاری ہے، قتل کیس میں حکومت کی جانب جوائنٹ انویسٹی گیشن ٹیم تشکیل دے دی گئی ہے، شفاف انداز میں تفتیش کےلئے کیس پر اثرانداز نہیں ہونا چاہیے۔