انگلینڈ میں اوورسیز پاکستانیوں نے افواج پاکستان کی بے لوث خدمات کو سلام پیش کرتے ہوئے کہا ہے کہ آرمی پاکستان کی ریڈ لائن ہے 9 مئی کو جو ہوا اس سے بد تر کچھ بھی نہیں ہو سکتا۔

بیرونِ ملک مقیم پاکستانیوں کا کہنا ہے کہ ’فوج‘ پاکستان کا بہت مضبوط ادارہ ہے ، اس کی حرمت ہم پر فرض ہے۔ ملک میں نو مئی کو جو ہوا وہ کسی تیسری دنیا کے ملک میں بھی نہیں ہوتا، یہ سوچی سمجھی سازش ہے، مٹھی بھر شرپسند اس ملک کو کسی افریقی ملک کی طرح بنانا چاہتے ہیں، یہ تو اچھا ہوا کہ ان لوگوں کی سازش بے نقاب ہوگئی۔

پاکستانیوں کا کہنا تھا کہ فوج ہے تو ہم ہیں، جس طرح ہماری فیڈریشن ہے، فوج ہی وہ واحد ادارہ ہے ، جس نے سب اداروں کو جوڑ رکھا ہے ، فوج کسی بھی ملک کی ریڈ لائن ہوتی ہے، پاک آرمی، پاکستان کی ریڈ لائن ہے، جو کچھ بھی 9 مئی کو ہوا، اس سے بد تر کچھ بھی نہیں ہو سکتا۔

انہوں نے کہا کہ شرپسندوں نے ریڈیو پاکستان پر حملہ کیا اسکے علاوہ پی ٹی وی اور پارلیمنٹ پر حملہ کیا، فوجی تنصیبات پر حملہ بالکل قابل معافی نہیں ہے۔

اوورسیز پاکستانیوں نے مطالبہ کیا کہ سانحہ 9 مئی میں ملوث جتنے بھی ملزمان ہیں ان سب کو گرفتار کیا جائے، ان شرپسندوں کو سخت سے سخت سزائیں دی جائیں، لوگ یہ بھول جائیں کہ ہم اوور سیز پاکستانی، پاک فوج کے خلاف ہیں، ہم پاک فوج کے ساتھ کھڑے ہیں اور ان کے ساتھ کھڑے رہیں گے۔