9 مئی کو ماڈل ٹاؤن لاہور میں مسلم لیگ آفس اور کلمہ چوک میں کنٹینر کو جلانے کے معاملے پر پولیس کی 3 مقدمات میں اعجاز چوہدری کا جسمانی ریمانڈ حاصل کرنے کی کوشش ناکام ہوگئی۔ انسداد دہشت گردی عدالت نے ایک مقدمے میں ڈسچارج جبکہ دیگر 3 مقدمات میں اعجاز چوہدری کو جوڈیشل ریمانڈ پر جیل بھجوا دیا۔

لاہور کی انسداد دہشت گردی عدالت کی ایڈمن جج عبہر گل خان نے کی سماعت کی۔

پی ٹی آئی رہنما اعجاز چوہدری کو کلمہ چوک کینٹنر نذر آتش کیس میں 2 روزہ جسمانی ریمانڈ مکمل ہونے پر پیش کیا گیا۔

پولیس نے دیگر3 مقدمات میں جیل سے طلبی لگوا کر جسمانی ریمانڈ کی استدعا کی۔

عدالت نے اعجاز چوہدری کی مزید جسمانی ریمانڈ کی استدعا مسترد کرتے ہوئے انہیں 3 مقدمات میں 14 روزہ جوڈیشل ریمانڈ پر جیل بھجوانے کا حکم دے دیا۔

تھانہ مڈل ٹاؤن کے مقدمہ نمبر 367/23 میں اعجاز چوہدری کو ڈسچارج کر دیا۔