سندھ کچے کے علاقے میں آپریشن کے لیے اسپیشل فورس تیار ہے، یہ فورس ڈاکوؤں اور پولیس کی کالی بھیڑوں کے درمیان روابط کا خاتمہ کردے گی، جرائم کے خاتمے کے لیے یہ فورس اہم کردار ادا کرے گی۔

کراچی سے 16 رکنی صحافیوں کی ٹیم گھوٹکی پہنچ گئی۔ ایس ایس پی گھوٹکی تنویر تنیو نے صحافیوں کو بریف کرتے ہوئے بتایا کہ خفیہ فورس کسی بھی موقع پر سب کے سامنے موجود نہیں ہوگی، فورس کے بارے میں آئی جی سندھ یا مجھے پتہ ہوگا۔

ایس ایس پی گھوٹکی نے مزید بتایا کہ منگل کو 2 مغویوں کو بازیاب کرایا گیا ہے، بازیاب ہونے والوں میں ایک ڈاکٹر بھی تھا۔

تنویر تنیو نے کہا کہ لوگ مختلف لالچ کا شکار ہوکر ٹریپ ہو جاتے ہیں، پولیس کو اس وجہ سے مشکلات کا سامنا کرنا پڑتا ہے، ڈاکو کو منشیات کی سہولیات بھی میسر ہیں، ایک ہزار پولیس اہلکار گھوٹکی کچے میں تعینات کیے ہیں۔

انہوں نے مزید کہا کہ کچے کے ڈاکوؤں سے مقابلے کے لیے اسنائپرز تیار کیے جارہے ہیں، آئی جی سندھ کے احکامات پر چوکیوں کی تعمیر جاری ہے۔