باجوڑ میں سکیورٹی فورسز اور دہشت گردوں کے درمیان جھڑپ کے دوران ایک سپاہی شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق باجوڑکے علاقے لوئی سم میں سکیورٹی فورسز اور دہشتگردوں کے درمیان جھڑپ ہوئی، فورسز نے مؤثر انداز میں دہشت گردوں کو جواب دیا جس کے نتیجے میں ایک دہشت گرد مارا گیا۔

آئی ایس پی آر کے مطابق شدید فائرنگ کے تبادلے کے دوران ڈی آئی خان کے 23 سالہ سپاہی شفیق الرحمان بہادری سے لڑتے ہوئے شہید ہوگئے۔

انٹر سروسز پبلک ریلیشزن کے مطابق علاقے میں ممکنہ دہشت گردوں کے خاتمے کے لئے کلئیرنس آپریشن کیا گیا۔

آئی ایس پی آر کا کہنا ہے کہ سکیورٹی فورسز دہشت گردی کی لعنت کے خاتمے کے لئے پرعزم ہیں اور بہادر سپاہیوں کی یہ قربانیاں ہمارے عزم کو مزید مضبوط کرتی ہیں ۔