شوہر کا ذکر نہ کرنے پر رہنما پاکستان تحریک انصاف (پی ٹی آئی) فواد چوہدری کی اہلیہ حبا فواد کا عمران خان کی ٹویٹ پر ردعمل سامنے آیا ہے۔

فواد چوہدری کی اہلیہ حبا فواد نے پارٹی چیئرمین عمران خان کو نام بھولنے پر یاد دہانی کروائی ہے کہ وہ پی ٹی آئی کے زیر حراست رہنماؤں کے حق میں ٹویٹ کرتے ہوئے ان کے شوہر فواد چوہدری، ملائیکہ بخاری، جمشید چیمہ اور مسرت چیمہ کے نام لکھنا بھول گئے ہیں۔

یاد رہے کہ عمران خان نے ایک ٹویٹ میں پارٹی کے زیر حراست رہنماؤں بشمول شاہ محمود قریشی، اسد عمر، شہریار آفریدی اور اُن کی اہلیہ، شیریں مزاری اور سینیٹر فلک ناز چترالی کا نام لے کر ذکر کیا اور ان کے خلاف ہونے والے پولیس ایکشن کی مذمت بھی کی۔

عمران خان کی یہ ٹویٹ سامنے آنے کے بعد حبا فواد نے ٹویٹ کرتے ہوئے لکھا کہ خان صاحب دوسرے لوگوں کے نام لکھتے ہوئے آپ فواد چوہدری، ملائیکہ بخاری، مسرت چیمہ اور جمشید چیمہ کے نام لکھنا بھول گئے ہیں۔

ایک اور ٹویٹ میں حبا فواد نے لکھا کہ اس کے علاوہ آپ تحریک انصاف کے دیگر زیر حراست لیڈروں، خواتین و مرد کارکنان اور بچوں کا نام لکھنا بھی بھول گئے۔

حبا فواد کا کہنا تھا کہ یہ مشکل وقت ہے لیکن خان صاحب اس وقت ہمیں آپ کی سپورٹ کی ضرورت ہے۔

دوسری جانب برطانوی نشریاتی ادارے سے گفتگو میں حبا فواد نے کہا کہ انہوں نے عمران خان سے گلہ نہیں کیا بلکہ حقیقت بیان کی ہے۔

ان کا کہنا تھا کہ گذشتہ روز فواد چوہدری کی رہائی اور ضمانت ملنے کے بعد بھی ان کے گاؤں میں واقع گھر پر حملہ کیا گیا۔ اگر عمران خان نام لے ہی رہے ہیں تو تمام لیڈر شپ کا لیں، سب کے ساتھ برابری کا سلوک ہونا چاہیے۔