سعودی فرماں روا شاہ سلمان بن عبدالعزیز نے شام کے صدر کو اگلے ہفتے جدہ میں ہونے والے عرب سربراہ اجلاس میں شرکت کی باضابطہ دعوت دی ہے۔

بشارالاسد کو2011 میں شام میں جنگ چھڑنے کے بعد پہلی مرتبہ کسی عرب سربراہ اجلاس میں شرکت کی دعوت دی ہے جبکہ شام نے دعوت نامے کی تصدیق کی ہے۔

سعودی فرمانروا شاہ سلمان کی میزبانی میں عرب لیگ کا 32 واں سربراہ اجلاس 19 مئی کو جدہ میں ہوگا۔ سعودی عرب کی جانب سے شامی عوام کی سیکیورٹی اور ملک کے استحکام کے لیے نیک خواہشات کا پیغام بھیجا گیا ہے۔

پیغام کے جواب میں شامی صدر نے بھی شاہ سلمان اور ولی عہد شہزادہ محمد بن سلمان کے لیے نیک خوہشات کا اظہار کرتے ہوئے ان کی تعریف کی ہے۔

یاد رہے کہ اتوار کو قاہرہ میں ہونے والے اجلاس میں شام کی عرب لیگ کی رکنیت بحال کی گئی تھی، شام کی رکنیت اس وقت معطل کی گئی تھی جب 2011 میں حکومت نے عوام کر کریک ڈاؤن کیا تھا۔