پاکستان تحریک انصاف (پی ٹی آئی) کے دور میں بھرتی سوشل میڈیا انفلوئنسرز کے اکاؤنٹس ریاست مخالف ہونے کی تحقیقات کیلئے ایف آئی اے کو مراسلہ ارسال کردیا گیا۔

پی ٹی آئی نے اپنی دور حکومت میں محکموں کی پروموشن کیلئے خیبرپختونخوا میں1,109 سوشل میڈیا انفلوئنسرز بھرتی کئے تھے جن کو نگراں حکومت نے پہلے برطرف کیا تھا۔

اب نگراں حکومت نے ایف آئی اے کو مراسلہ ارسال کرکے سوشل میڈیا انفلوئنسرز کے خلاف تحقیقات کی درخواست کی ہے۔ محکمہ اطلاعات نے تمام انفلوئنسرز کی تفصیلات بھی ایف آئی اے کو فراہم کردی ہے۔

مراسلہ میں لکھا گیا ہے کہ میڈیا انفلوئنسرز کے بارے میں تحقیقات کی جائے کیونکہ انفلوئنسرز کے خلاف ریاستی اداروں کو بدنام کرنے اور ریاست مخالف سرگرمیوں میں ملوث ہونے کی غیرمصدقہ اطلاعات ہیں۔