گورنر ہاؤس سندھ میں عوام کیلئے ڈنر اور قوالی کا اہتمام کیا گیا۔

گورنر سندھ کامران ٹیسوری کی جانب سے گورنر ہاؤس کراچی میں عوام کے لئے ڈنر اور قوالی کا اہتمام کیا گیا، جس میں عوام کی بڑی تعداد نے شرکت کی۔

مرحوم قوال امجد صابری کے صاحبزادے مجدد امجد صابری نے والد کا کلام سنا کر سماں باندھ دیا، اور افضل صابری نے بھی خوبصورت پرفارمنس دی اور گورنر سندھ اور حاضرین کی جانب سے بھرپور داد وصول کی۔

اس موقع پر گورنرسندھ کامران ٹیسوری کا کہنا تھا کہ مجدد نے آج میرے دوست امجد صابری کی یاد تازہ کردی، اس کی آواز اور انداز بالکل اپنے والد جیسا ہے، میری دعا ہے کہ مجدد اپنے والد کی طرح نام کمائے۔

گورنر سندھ نے کہا کہ آج کی تقریب کا مقصد عوام کو تفریح کا موقع فراہم کرنا ہے، مجھے سیکیورٹی کے تھریٹس موصول ہوئے ہیں، لیکن اس کے باوجود عوام میں جانا ترک نہیں کیا۔