دفترخارجہ کے ترجمان نے کہا ہے کہ وزیر خارجہ بلاول بھٹو زرداری بھارت میں ہونے والے شنگھائی تعاون تنظیم کے وزرائے خارجہ اجلاس میں شرکت کریں گے۔

اسلام آباد میں اپنی ہفتہ وار بریفنگ میں ترجمان دفترخارجہ ممتاز زہرہ بلوچ نے بتایا کہ وزیرخارجہ بلاول بھٹو زرداری 4 اور 5 مئی کو بھارت کے شہر گووا میں منعقدہ وزرائے خارجہ اجلاس میں شریک ہوں گے، اور ان کے ہمراہ پاکستانی وفد بھی ہوگا۔

ترجمان دفترخارجہ نے بتایا کہ بلاول بھٹو اپنے بھارتی ہم منصب اور ایس سی او کے موجودہ چیئرمین ایس جے شنکر کی دعوت پر وزرائے خارجہ کے اجلاس میں شرکت کررہے ہیں۔

ممتاز زہرہ بلوچ کا کہنا تھا کہ اجلاس میں شرکت شنگھائی تعاون تنظیم کے چارٹر سے ہماری وابستگی اور خطے کے لیے خارجہ پالیسی کی ترجیحات میں پاکستانی عزم کی اہمیت کی عکاس ہے۔

ترجمان دفترخارجہ نے کہا کہ پاکستان شنگھائی تعاون تنظیم سے دیرینہ وابستگی کے باعث اجلاس میں شرکت کرتا ہے، تنظیم کا موسمیاتی تحفظ کے بارے میں چوتھا وزارتی اجلاس 18 اپریل 2023 کو نئی دہلی میں آن لائن منعقد ہوا تھا۔