اگرسانپ کسی شخص کو کاٹ لے تو متاثرہ شخص کو فوری طور پراسپتال منتقل کیا جاتا ہے لیکن بھارت میں ایک ایسا انوکھا واقعہ پیش آیا جہاں سانپ کی ڈسی جانے والی بیوی کے بجائے شوہر سانپ کو اسپتال لے گیا۔

میڈیا رپورٹ کے مطابق بھارتی ریاست اترپردیش کے ضلع اناؤ کے ایک اسپتال میں موجود ڈاکٹرز اورعملہ خوف میں مبتلا ہوگیا جب خاتون کا شوہر تھیلے میں سانپ لیکر اسپتال پہنچ گیا۔

نریندر کی بیوی کسم گھر میں صفائی سُتھرائی کا کام کررہی تھی کہ اس دوران ہی سانپ نے کاٹ لیا جس کے بعد وہ بے ہوش ہوگئی، تو خاتون کو فوری طور پر پڑوسیوں نے اسپتال منتقل کردیا۔

رپورٹ کے مطابق واقعے کی اطلاع ملتے ہی شوہر نے اسپتال جانے کے بجائے گھر پہنچا اور وہاں موجود سانپ کو پکڑ کراسپتال لے گیا، جس کی وجہ سے اسپتال میں خوف ہراس پھیل گیا۔

حکام نے سوال پوچھا کہ وہ سانپ کو اسپتال کیوں لیکر آیا ہے، تو نریندر نے بتایا کہ وہ ڈاکٹرز کو سانپ دیکھانا چاہتا تھا کہ تاکہ وہ سانپ کے زہر کے مطابق ہی اِس کی بیوی کا علاج کریں۔

خیال رہے کہ سانپ کے ڈسنے کے بعد خاتون کی حالت خطرے سے باہر بتائی جاتی ہے اور سانپ کو قریبی جنگل میں چھوڑ دیا گیا ہے۔