بلوچستان حکومت نے شام کے زلزلہ متاثرین کیلئے امداد روانہ کردی۔ 10 ہزار افراد کے لئے خوراک سمیت دیگر اشیاء کراچی پورٹ سے روانہ کی گئیں۔

وزیر داخلہ بلوچستان ضیاء اللہ لانگو کہتے ہیں پاکستان کے سیلاب متاثرین کی پوری دنیا نے مدد کی اب ہماری باری ہے، صرف انسانیت کے ناطے لوگوں کی مدد کریں۔

تقریب کے مہمان خصوصی میر ضیاءاللہ لانگو کا کہنا تھا کہ ترکی اورشام میں خطرناک زلزلہ آیا، وزیراعلیٰ بلوچستان نے ایک ارب روپے کی رقم مختص کی جس سے شام کے لوگوں کی مدد کررہے ہیں۔

وزیرداخلہ بلوچستان نے مزید کہا کہ جب ہم سیلاب سے متاثر ہوئے تو کئی ملکوں نے مدد کی، اب ہماری باری ہے کہ ہم ملکوں سے بالاترصرف انسانیت کے ناطے مدد کریں۔

اس موقع پر ڈائریکٹر پی ڈی ایم اے فیصل طارق نے بتایا کہ 40 کنٹینرز پر مشتمل امدادی سامان 25 دنوں میں شام پہنچے گا اور حکومتی نگرانی میں متاثرین میں تقسیم کیا جائے گا۔