لاہور میں پولیس نے کارروائی کرتے ہوئے گھریلو ملازمہ کو بازیاب کروالیا اورمزاحمت کرنے پر سیکیورٹی گارڈ کو گرفتار کرلیا گیا ہے۔

پولیس کے مطابق نجی سوسائٹی سے گھریلو ملازمہ مریم پر تشدد کی کال ایمرجنسی ون فائیو پر موصول ہوئی تھی۔

کالرنے بتایا کہ گھریلو ملازمہ پر تشدد کیا جارہا ہے، سیف سٹیز اتھارٹی سے پولیس رسپانس یونٹ کو موقع پر پہنچنے کی ہدایت ملی۔ ریسکیو کیلئے پی آر یو سیکٹر انچارج چوہنگ اور ڈولفن ٹیم نے مشترکہ کارروائی کی۔

متعلقہ گھر کے سیکیورٹی گارڈ شہباز نے ریسکیو آپریشن کے دوران مزاحمت کی جسے پولیس نے گرفتار کرلیا ہے۔

پولیس ٹیم نے گھریلو ملازمہ مریم کو تحویل میں لیا اور ٹوبہ ٹیک سنگھ سے والد کو بلوا کر اس کے حوالے کردیا۔