عباسی شہید اسپتال میں سیکیورٹی کی فراہمی کیلئے ینگ ڈاکٹرز کا احتجاج ساتویں روز میں داخل ہوگیا، ڈاکٹرز نے او پی ڈیز کا بھی بائیکاٹ کردیا۔

عباسی شہید اسپتال کے پیڈز وارڈ پر سات روز قبل نامعلوم افراد نے دھاوا بول دیا تھا جس میں خواتین ڈاکٹرز کو ہراساں کرنے کی کوشش کی گئی تھی۔

ڈاکٹرزکا کہنا ہے کہ کسی بھی ناخوشگوار صورتحال میں سٹی وارڈنز اپنی جان بچا کر بھاگ جاتے ہیں، ان کے تحفظ کیلئے سیکیورٹی گارڈ فراہم کیے جائیں۔

ڈاکٹرز نے خبردار کرتے ہوئے کہا کہ اگر ان کا مطالبہ نہ مانا گیا، تو وہ اپنے احتجاج کا دائرہ وسیع کریں گے اور او پی ڈی تب تک بند رہیں گی جب تک ہمارے مطالبے نہیں مانے جاتے۔

ڈاکٹرزکا کہنا ہے انتظامیہ ڈاکٹرز کا استحصال کرنا بند کرے ہم اور کچھ نہیں سیکیورٹی مانگ رہے ہیں۔

مزید کہا کہ جب تک سیکیورٹی کی فراہمی کو یقینی نہیں بنایا جائیگا ہم ڈیوٹی نہیں کریں گے، انتظامیہ کو چاہیے کہ وہ اپنے اسٹاف کے جائز مطالبات حل کرے۔