بڑھتی ہوئی مہنگائی اور قرضوں میں ڈوبی صوبائی حکومت کے اقدامات کے پیش نظر سرکاری ملازمین کے لئے بھی گزارا مشکل ہوگیا۔

ایسے میں محکمہ صحت سے وابسطہ شازیہ قرض داروں سے پریشان دکھائی دے رہی ہیں، رمضان المبارک اور عید کی آمد نے ان کی پریشانی مزید بڑھا دی ہے۔

آج نیوز کے رپورٹر کامران علی نے شازیہ سے گفتگو کرتے ہوئے شازیہ نے کہا کہ ان کے شوہر کی وفات ہوگئی ہے اور ان کے چار بچے ہیں جنہیں وہ اسکول میں پڑھا رہی ہیں، ان کی فیسیں بھی بہت زیادہ ہیں، بچوں کے اخراجات بھی کم کیے ہیں۔

انہوں نے کہا کہ الخدمت فاؤنڈیشن کے ذریعے بچوں نے تعلیم حاصل کی، دوسروں کی مدد کرنے سے بھی ہمارے گھر کے اخراجات پورے نہیں ہوسکتے، 6 مہینوں سے تنخواہ نہیں مل رہی، اور جب بھی ادارے سے تنخواہ کا پوچھو تو کہتے ہیں کہ فنڈز نہیں ہیں۔

شازیہ کا کہنا تھا کہ رمضان اور عید میں تو پیسوں کی زیادہ ضرورت ہوتی ہے، یہ ہمارے تہوار ہیں کیسے منائیں گے، ایک دکاندار سے اتنا قرض لیا ہے کہ وہ بھی بار بار اپنے پیسے مانگتا ہے۔