اسلام آباد کی انسداد دہشت گردی عدالت میں تحریک انصاف کے وکلاء نے تھانہ سنگجانی مقدمے میں شامل دہشت گردی کی دفعات کو چیلنج کردیا۔

انسداد دہشت گردی عدالت کے جج راجہ جواد عباس نے تھانہ سنگجانی میں کارِسرکار میں مداخلت اور توڑ پھوڑ سے متعلق مقدمے کی سماعت کی۔

مزید پڑھیں: عدالت سے پہلے تو ٹی وی پر آپ کے دلائل چل جاتے ہیں، جج کا عمران خان کے وکیل سے مکالمہ

اسدعمر، علی نوازاعوان، عامر مغل سمیت دیگر پی ٹی آئی رہنماؤں کی جانب سے وکیل سردار مصروف پیش ہوئے۔

وکیل نے مقدمے میں لگی دہشت گردی کی دفعات کو چیلنج کردیا۔

عدالت نے فریقین کو نوٹس جاری کرتے ہوئے جواب طلب کرلیا جبکہ عدالت نے اسد عمر کی حاضری سے استثنیٰ کی درخواست بھی منظور کرلی۔

مزید پڑھیں: انسدادِ دہشت گردی عدالت میں عمران خان کی عبوری ضمانت کیلئے درخواست دائر

عدالت نے آئندہ سماعت پر فریقین سے دہشت گردی کی دفعات حذف کرنے کی درخواست پر دلائل طلب کرتے ہوئے سماعت 28 مارچ تک ملتوی کردی ۔

واضح رہے کہ عمران خان کے خلاف دہشت گردی کی دفعات کے تحت تھانہ سنگجانی میں مقدمہ درج کیا گیا تھا۔

پی ٹی آئی کے چیئرمین عمران خان کی نااہلی کے خلاف احتجاج کرنے پر سابق وزیر اعظم، اسد عمر اور علی نواز سمیت 100 سے زائد کارکنان کے خلاف دہشت گردی کا مقدمہ درج کیا گیا تھا۔