الیکشن کے حوالے سے چیف الیکشن کمشنر کی زیر صدارت اجلاس میں سیکریٹری دفاع نے بتایا کہ انتخابات کی سیکیورٹی کیلئے پاک فوج کے اہلکار نہیں دے سکتے بلکہ پاک فوج صرف کوئیک ریسپانس فورس کے طور پر فراہم کی جاسکتی ہے۔

الیکشن کمیشن میں چیف الیکشن کمشنرسکندرسلطان راجہ کی زیرصدارت اجلاس منعقد ہوئے۔ جس میں پنجاب میں سیکیورٹی انتظامات پربریفنگ دی گئی۔

الیکشن کمیشن اعلامیہ کے مطابق آئی جی پولیس اور چیف سیکریٹری پنجاب نے 30 اپریل کو الیکشن کیلئے فول پروف سیکیورٹی فراہم کرنے سے معذرت کرلی۔

چیف سیکرٹری نے کہا کہ موجودہ حالات میں صاف شفاف انتخابات کرانا ممکن نہیں۔

آئی جی نے بتایا کہ الیکشن کیلئے پولیس کے ساتھ پاک فوج کے اہلکاروں کی تعیناتی انتہائی ضروری ہے۔

سیکریٹری دفاع نے الیکشن کمیشن کو ملک بھر میں سیکیورٹی صورتحال پر بریفنگ دی۔

سیکرٹری دفاع نے کہا کہ پاک فوج کیلئے سرحدوں اور ملک کی حفاظت اولین ترجیح ہے۔ انتخابات کی سیکیورٹی کیلئے فوجی اہلکار فراہم نہیں کرسکتے۔ اہلکاروں کو صرف کوئیک ریسپانس فورس کے طور پر فراہم کر سکتے ہیں۔