بالی ووڈ کے معروف کامیڈین اور تجربہ کار اداکار و ہدایت کار ستیش کوشک جمعرات کی علی الصبح انتقال کر گئے، ان کے انتقال کی خبر نے مداحوں، دوستوں اور انٹرٹینمنٹ انڈسٹری کو صدمے میں مبتلا کردیا۔

ستیش کوشک 66 برس کے تھے۔ ان کے قریبی دوست اور انڈسٹری کے ساتھی انوپم کھیر کے مطابق، ستیش کوشک کو جمعرات کی صبح تقریباً ایک بجے دل کا دورہ پڑا جو جان لیوا ثابت ہوا۔

دنیا بھر میں بالی ووڈ سینما کے مداح اس نقصان پر سوگ منا رہے ہیں، جبکہ تمام حلقوں سے خراج تحسین اور تعزیتی پیغامات کا سلسلہ جاری ہے۔

اداکار سنجے کپور جن کی پہلی فلم ”پریم“ کی ہدایت کاری ستیش کوشک نے کی تھی، نے سوشل میڈیا پر دلی تعزیتی نوٹ شیئر کیا ہے۔

انہوں نے فلم کے سیٹ سے ایک بلیک اینڈ وائٹ تصویر پوسٹ کی جس میں وہ آنجہانی فلمساز اور ساتھی اداکارہ تبو کے ساتھ نظر آرہے ہیں۔

سنجے کپور نے لکھا کہ وہ افسوسناک خبر سن کر حیران رہ گئے۔

سنجے کپور نے مزید لکھا کہ، ”انتہائی دکھی اور صدمے میں ہوں۔ میری پہلی فلم پریم کو ستیش جی نے ڈائریکٹ کیا تھا اور وہ کتنے باصلاحیت ہدایت کار و اداکار تھے، ان کے بارے میں اتنی پیاری یادیں ہیں، اور میں ہضم نہیں کر سکتا کہ وہ اب نہیں رہے۔ آپ ہمیشہ میرے دل کے قریب رہیں گے۔“

سنجے کپور واحد اداکار نہیں ہیں جنہوں نے ستیش کوشک کے ساتھ اپنا ڈیبیو کیا۔

اداکار تشار کپور نے ستیش کوشک کی ہدایت کاری میں بننے والے پروجیکٹ ”مجھے کچھ کہنا ہے“ کے ساتھ اپنے کرئیر کا آغاز کیا اور انہوں نے بھی سوشل میڈیا پر ایک متحرک خراج تحسین پیش کیا ہے۔

انہوں نے بھی ایک تصویر شیئر کی جس میں وہ آنجہانی فلمساز کے ساتھ نظر آرہے ہیں۔

تشار کپور نے لکھا کہ وہ ہدایت کار کی موت کی ”خوفناک خبروں پر یقین نہیں کرپا رہے“۔

کرینہ کپور جنہوں نے ”مجھے کچھ کہنا ہے“ میں تشار کپور کے مدمقابل مرکزی کردار ادا کیا تھا، نے بھی آنجہانی فلم ساز کے لیے وقف ایک نوٹ شیئر کیا۔

ستیش کوشک نے کرینہ کپور کے ساتھ ”ملیں گے ملیں گے“ کے ایک اور پروجیکٹ میں ہدایت کاری کی۔

ستیش کوشک نامور نیشنل اسکول آف ڈرامہ اور فلم اینڈ ٹیلی ویژن انسٹی ٹیوٹ آف انڈیا کے سابق طالب علم ہیں۔

وہ جانے بھی دو یاروں، اڑتا پنجاب، مسٹر انڈیا، دیوانہ مستانہ جیسی فلموں میں اپنے کام کے لیے جانے جاتے ہیں۔

بطور ہدایت کار، ان کے پاس تیرے نام، ملیں گے ملیں گے، اور مجھے کچھ کہنا ہے جیسی فلمیں ہیں۔

ستیش کوشک کے پسماندگان میں ان کی اہلیہ ششی کوشک اور بیٹی ونشیکا ہیں۔