پاکستان اور امریکہ کے درمیان انسداد دہشتگردی پر دو روزہ مزاکرات کل سے اسلام آباد میں ہونے جا رہے ہیں۔

انسداد دہشتگردی پر دو روزہ پاک امریکا مذاکرات کل سے اسلام آباد میں شروع ہو رہے ہیں، جس میں درپیش دہشت گردی کے مشترکہ خطرات پر تبادلہ خیال کے علاوہ سرحدی سلامتی اور دہشت گردی کی مالی معاونت کی روک تھام جیسے اہم امور میں تعاون کے حوالے سے حکمت عملی تیار کی جائے گی۔

اس حوالے سے دفتر خارجہ کی جانب سے اعلامیہ جاری کیا گیا ہے، جس میں بتایا گیا ہے کہ دو روزہ پاک امریکا مذاکرات میں پاکستانی وفد کی قیادت ایڈیشنل سیکرٹری سید حیدر شاہ جب کہ قائم مقام کوآرڈینٹر برائے کاونٹر ٹیرارزم کرسٹوفر لینڈبرگ امریکی و فد کی قیادت کریں گے۔

دفترخارجہ کے مطابق مزاکرات میں دہشتگردی کے خطرات سے نمٹنے کا لائحہ عمل تشکیل دیا جائے گا، جب کہ امریکا اور پاکستان دونوں ممالک کو درپیش دہشت گردی کے مشترکہ خطرات پر تبادلہ خیال کریں گے۔

مذاکرات میں سرحدی سلامتی اور دہشت گردی کی مالی معاونت کی روک تھام جیسے اہم امور میں تعاون کے حوالے سے پالیسی پر مبنی حکمت عملی تیار کی جائے گی۔