تحریک انصاف کے رہنما فواد چوہدری کا کہنا ہے کہ ہماری ریاستی صلاحیتوں پر سوال کھڑے کئے جارہے ہیں یہ اسٹیبلشمنٹ کے غیر ضروری تجربے کے ثمرات ہیں۔

سماجی رابطے کی ویب سائٹ ٹویٹر پر اپنی ٹویٹ میں رہنما پی ٹی آئی فواد چوہدری کا کہنا تھا کہ شہباز شریف ایک بار پھر غیر ملکی دورے پر روانہ ہو گئے ہیں، اور وزیر خارجہ پوری دنیا گھوم چکے ہیں، سمجھ سے باہر ہے اتنے دوروں نے پاکستان کو کیا دیا۔

فواد چوہدری کا کہنا تھا کہ ہمارے قریب ترین دوست ممالک پاکستان کے مالیاتی بحران کے معاملے سے لاتعلق کھڑے ہیں، جب کہ کشمیر اور افغانستان کے حوالے سے دس ماہ میں کبھی کہیں ذکر ہی نہیں ہوا۔

رہنما پی ٹی آئی نے کہا کہ پاکستان کے اندر ظلم اور جبر کی حکومت ہے انسانی اور سیاسی حقوق سلب ہوچکے ہیں، بلوچستان اور خیبرپختونخوا کے بعد اب پنجاب میں لوگ مِسنگ پرسنز بن رہے ہیں۔

فواد چوہدری کا مزید کہنا تھا کہ بحیثیت جوہری ریاست ہماری ریاستی صلاحیتوں پر سوال کھڑے کئے جارہے ہیں، یہ اسٹیبلشمنٹ کے غیر ضروری تجربے (Regime Change) کے ثمرات ہیں۔