لاہور ہائیکورٹ نے پاکستان تحریک انصاف کے رہنما اسد عمر کی نظر بندی کے خلاف درخواست واپس لینے کی بناء پر نمٹا دی۔

لاہور ہائیکورٹ کے جسٹس شہرام سرور نے اسد عمر کی نظر بندی کے خلاف ان کی اہلیہ صفیہ فاطمہ عمر کی درخواست پر سماعت کی، عدالت نے درخواست واپس لینے کی بناء پر نمٹا دی۔

درخواست گزار کے وکیل نے درخواست واپس لینے کی تحریری استدعا کر دی۔

متفرق درخواست میں مؤقف اپنایا گیا ہے کہ درخواست واپس لے کر متعلقہ فورم سے رجوع کرنا چاہتے ہیں۔

عدالت نے اس سے اتفاق کرتے ہوئے درخواست واپس لینے کی اجازت دے دی۔

صفیہ فاطمہ عمر نے درخواست میں ڈپٹی کمشنر لاہور، سی سی پی او، آئی جی پنجاب اور جیل سپرنٹنڈنٹ کو فریق بنایا ہے۔

ڈپٹی کمشنر لاہور رافعہ حیدر کی جانب سے اسد عمر کی نظر بندی کے احکامات جاری کیے گئے ہیں۔

درخواست میں استدعا کی گئی ہے کہ اسد عمر کی نظر بندی کے احکامات غیر قانونی ہیں، نظر بندی کے احکامات کالعدم قرار دے کر عدالت میں پیش کرنے کا حکم دیا جائے۔

واضح رہے کہ اسد عمر نے پاکستان تحریکِ انصاف کی جیل بھرو تحریک کے تحت لاہور میں گرفتاری دی تھی۔