بالی ووڈ کے مشہور اداکار ارشد وارثی اور ان کی اہلیہ ماریہ گورٹی، ان 45 افراد اور کمپنیوں میں شامل ہیں جن پر سیکیورٹیز اینڈ ایکسچینج بورڈ آف انڈیا (ایس ای بی آئی) نے سیکیورٹیز مارکیٹ میں حصہ لینے پر پابندی عائد کردی ہے۔

این ڈی ٹی وی کے مطابق یہ فیصلہ دو کمپنیوں، شارپ لائن براڈکاسٹ لمیٹڈ اور سادھنا براڈکاسٹ لمیٹڈ کے بعض اداروں کی جانب سے یوٹیوب چینلز پر گمراہ کن ویڈیوز اپ لوڈ کرکے حصص کی قیمتوں میں ہیرا پھیری کے الزامات کی تحقیقات کے بعد آیا ہے۔

ایس ای بی آئی نے پایا کہ کچھ لوگوں نے جھوٹی اور گمراہ کن ویڈیوز اپ لوڈ کیں جن میں سرمایہ کاروں کو غیر معمولی منافع کے لیے سادھنا براڈکاسٹ لمیٹڈ اور شارپ لائن براڈکاسٹ لمیٹڈ کے حصص خریدنے کا مشورہ دیا گیا ۔

این ڈی ٹی وی کے مطابق پابندی کے ساتھ ساتھ ایس ای بی آئی نے یوٹیوب چینلز پر گمراہ کن ویڈیوز اپ لوڈ کرکے کمائے گئے 54 کروڑ کے غیر قانونی منافع کو بھی ضبط کرلیا ہے۔

عبوری حکم کے مطابق ارشد وارثی نے 29.43 لاکھ روپے جب کہ ان کی اہلیہ ماریہ گورٹی نے 37.56 لاکھ روپے کا منافع کمایا۔ اس کے علاوہ اقبال حسین وارثی نے 9.34 لاکھ روپے کا منافع کمایا۔