پاکستان تحریک انصاف کے رہنما شاہ محمود قریشی کے بیٹے زین قریشی نے اپنے والد کی بازیابی کے لئے لاہور ہائیکورٹ سے رجوع کر لیا ہے۔

شاہ محمود قریشی کے بیٹے زین قریشی نے اپنے والد کی بازیابی کے لئے لاہور ہائیکورٹ میں درخواست دائر کی ہے۔

درخواست میں مؤقف اپنایا گیا ہے کہ شاہ محمود قریشی کو حبس بے جا میں رکھا گیا ہے، ان کو کل پولیس نے حراست میں لیا ہے، ہمیں نہیں بتایا جا رہا کہ شاہ محمود قریشی کہاں ہیں۔

درخواست میں استدعا کی گئی ہے کہ لاہور ہائیکورٹ شاہ محمود قریشی کو بازیاب کراکے رہا کرنے کا حکم دے۔

ادھر پی ٹی آئی رہنماؤں اسد عمر، اعظم سواتی اور سینٹر ولید اقبال کی بازیابی کی درخواست بھی دائر کردی گئی۔

دوسری جانب تحریک انصاف کے رہنما شاہ محمود قریشی سمیت دیگر رہنماؤں کی بازیابی کی درخواستیں لاہور ہائیکورٹ میں سماعت کیلئے مقرر کرلی گئی ہیں۔ جسٹس شہرام سرور چوہدری کل درخواستوں پر سماعت کریں گے۔