وزیر داخلہ رانا ثناء اللہ کا کہنا ہے کہ جیل بھرو تحریک کے اصل مقاصد ایک ڈرامہ رچانا، میڈیا کی توجہ حاصل کرنا، امن وامان کی صورتِ حال کو متاثر کرنا اور عدم استحکام پیدا کرنا۔

اسلام آباد میں وزیرِ داخلہ رانا ثناء اللہ کی زیرصدارت امن و امان کی صورتِ حال پر اجلاس ہوا، جس میں جیل بھرو تحریک سے متعلق تفصیلی بریفنگ دی گئی۔

اجلاس میں سیکرٹری داخلہ، پنجاب، سندھ، خیبرپختونخوا اور اسلام آباد کے آئی جیز سمیت ہوم سیکرٹریز، کمشنر اسلام آباد اور دیگر اعلیٰ افسران نے شرکت کی۔

اجلاس میں گفتگو کرتے ہوئے وزیر داخلہ نے کہا کہ قانون توڑنے والوں کو عوام کے سامنے لایا جائے گا، قانون شکنوں کا اصل چہرہ بے نقاب کریں گے۔

انہوں نے ہدایت کی کہ خواتین اورغریب کارکنوں کی گرفتاری سے گریز کیا جائے۔