وزیراعلیٰ بلوچستان عبدالقدوس بزنجو نےمحکمہ قانون کے اقدام کو صوبے کی تاریخ میں اہم سنگ میل قرار دیتےہوئے اہم ٹاسک کی تکمیل پر متعلقہ افسران کے لئے تعریفی اسناد کا اعلان بھی کیا ہے۔

وزیراعلیٰ بلوچستان کا کہنا ہے کہ محکمہ قانون نے لوگوں کے لئے تاریخی قوانین تک فوری رسائی کو ممکن بنایا ہے۔ تمام تحریری مواد کو محکمہ قانون کی ویب سائٹ پر بھی اپ لوڈ کرنا قابل تعریف اقدام ہے۔

انھوں نےکہا کہ محکمہ قانون نے تمام قوانین ، نوٹیفکیشن ، قانونی رہنمائی پر مشتمل حوالہ جات کو چھ جلدوں میں شائع کرکے تمام والیومز مکمل کرلئے ہیں۔

عبدالقدوس بزنجو نے مزید کہا کہ حکومت اپنے فرائض محنت اور لگن سے انجام دہی کرنے والے افسران و اہلکاران کی بھرپور حوصلہ افزائی جاری رکھے گی، توقع ہے دیگر محکمے بھی روایتی کار گزاری سے ہٹ کر پالیسی سازی اور مشکل اہداف کے حصول کو یقینی بنائیں گے۔

ان کا کہنا تھا کہ ایسے ہر اچھے کام کی سرپرستی کرینگے جس سے عام آدمی کو بھی فائدہ ہو اور محکموں کی کار کردگی میں بھی بہتری آئے۔