وفاقی وزیر داخلہ رانا ثناء اللہ نے سابق وزیراعلیٰ پرویز الٰہی کی آڈیو لیک کے معاملے پر وفاقی تحقیقاتی ایجنسی (ایم آئی اے) کو تحقیقات کی اجازت دے دی۔

ذرائع کے مطابق وزیرداخلہ کی جانب سے اجازت دیئے جانے کے بعد ایف آئی اے میں پرویز الہی کی لیک آڈیوز کی تحقیقات کا آغاز ہوگیا۔

ذرائع کا کہنا ہے کہ ایف آئی اے نے پہلے مرحلے میں لیک آڈیوز کی فرنزک کرانے کا فیصلہ کرلیا ہے جس کے تحت پرویز الہی کی آڈیوز کو فرانزک کے لئے لاہور لیب بھجوایا جائے گا۔

خیال رہے گزشتہ روز رانا ثناء اللہ نے پرویز الٰہی اور ایک جج کے مابین گفتگو کی آڈیو ریلیز کرتے ہوئے چیف جسٹس آف پاکستان سے معاملے پر نوٹس لینے کا مطالبہ کیا تھا۔

دوسری جانب اس ضمن میں پاکستان بار کونسل (پی بی سی) کا کہنا تھا کہ چیف جسٹس مخصوص جج کے سامنے مقدمہ مقرر کے معاملے کی چھان بین کرائیں۔ مبینہ آڈیو درست ثابت ہونے کی صورت میں آرٹیکل 209 کے تحت کارروائی کی جائے، اور آڈیو جعلی ہونے کی صورت میں ذمہ داروں کے خلاف کارروائی کی جائے۔