فواد چوہدری نے سی سی پی او لاہور غلام محمود ڈوگرکا تبادلہ روکنے سے متعلق سپریم کورٹ کے فیصلے کی تعریف کرتے ہوئے کہا ہے کہ عدالتی فیصلے سے سیکڑوں تبادلے غیر مؤثر ہوجائیں گے۔

پی ٹی آئی رہنما نے سپریم کورٹ کے فیصلے کے بعد ردعمل میں کی جانے والی ٹویٹ میں لکھا کہ عدالتی فیصلے سے فسطائی حکومت کی پنجاب برانچ کو خاص طور پر بڑا دھچکا لگے گا۔

فواد چوہدری کا کہنا تھا کہ ’‏جدید معاشرے ان آزادیوں کا مرہون منت ہیں جن کی تشریح بڑے جج صاحبان نے سپریم کورٹس میں کیں، سپریم کورٹ کا آج کا فیصلہ ایسا ہی ایک فیصلہ ہے‘۔

واضح رہے کہ سپریم کورٹ نے سی سی پی اولاہورغلام محمود ڈوگرکے تبادلہ کا فیصلہ معطل کرتے ہوئے کہا ہے کہ بادی النظرمیں سی سی پی او کا تبادلہ کا حکم قانون کے برخلاف تھا کیسے چیف الیکشن کمشنر ایک فون کال پرزبانی ٹرانسفرکرسکتے ہیں ؟ قانون کے تحت انکے پاس یہ اختیارات ہی نہیں ہے۔

عدالت نے کہا کہ الیکشن کمیشن 26 جنوری کو تمام افسران کے تبادلے کا ازخود حکم کس بنیاد پردے سکتا؟ مسٹرایکس کو کہہ دیتے صبرکریں، کمیشن درخواست پر فیصلہ کرے گا ، گھڑی بہت تیز چل رہی ہے،ٹک، ٹک، ٹک،90 روز ختم ہونے کو ہیں اورالیکشن کمیشن مزید وقت مانگ رہا ہے۔