گورنر پنجاب بلیغ الرحمان نے پنجاب میں الیکشن کی تاریخ سے متعلق سنگل بینچ کا فیصلہ لاہور ہائیکورٹ میں چیلنج کردیا۔

لاہور ہائیکورٹ میں گورنر پنجاب کی جانب سے شہزاد شوکت ایڈووکیٹ نے سنگل بینچ کے فیصلے کی تشریح کے لئے درخواست دائر کی۔

درخواست میں مؤقف اختیار کیا گیا ہے کہ سنگل بینچ نے الیکشن کمیشن کو گورنر پنجاب سے الیکشن کی تاریخ سے متعلق بات کرنے کا حکم دیا، گورنر پنجاب نے اسمبلی تحلیل کرنے کی سمری پر دستخط ہی نہیں کیے۔

درخواست میں کہا گیا ہے کہ عدالتی فیصلہ پنجاب میں انتخابات کی تاریخ کے حوالے سے مشاورت کا کہا گیا ہے، عدالت انتخابات کی تاریخ کے حوالے سے مشاورت کے فیصلے کی تشریح کرے تاکہ عدالتی حکم پر عملدرآمد ممکن بنایا جا سکے۔

واضح رہے کہ 2 روز قبل گورنر پنجاب نے صوبے میں الیکشن کے حکم کی وضاحت کے لئے لاہور ہائیکورٹ سے رجوع کرنے کا فیصلہ کیا تھا۔

لاہور ہائیکورٹ کے حکم پر پنجاب میں انتخابات کی تاریخ کے حوالے سے الیکشن کمیشن وفد نے گورنر پنجاب بلیغ الرحمان سے گورنر ہاؤس پنجاب میں ملاقات بھی کی تھی۔ اس موقع پر چیف سیکریٹری اور آئی جی پنجاب بھی موجود تھے، جنہوں نے صوبے میں انتظامی اور امن و امان کی صورتحال پر بریفنگ دی تھی۔

لاہور ہائی کورٹ نے الیکشن کمیشن کو پنجاب میں الیکشن کی تاریخ کا اعلان کرنے اور گورنر سے مشاورت کے بعد نوٹیفئکیشن جاری کرنے کا حکم دیا تھا۔