کراچی میں ہونے والی اجتماعی شادی کی تقریب میں ہندو برادری کے چھبیس جوڑوں نے زندگی بھر ساتھ نبھانے کی قسم کھالی، خوشی کی اس تقریب میں خوب ہلا گلا ہوا، آتش بازی نے سرد موسم ماحول گرما دیا۔

کراچی میں ہندو برادری کے تحت کراچی کے ریلوے گراؤنڈ میں اجتماعی شادی کی تقریب سجی، مہیشوری میگھوار برادری نے شادی کی تقریب کا انعقاد کیا جس میں 26 جوڑے شادی کے بندھن میں بندھ گئے۔

آل پاکستان ہندو پنچائت نے تیسری مرتبہ تقریب سجا کر اپنی برادری میں خوب داد سمیٹی، منتظمین نے بے مقصد رسم ورواج کے فرسودہ نظام کے خاتمے کو مقصد قرار دیا۔

شرکاء نے بھی اجتماعی شادی کی تقریب کے انعقاد کو سراہا۔

ہندو برادری کی یکجہتی اور آل پاکستان ہندو پنچائت کی کارکردگی قابل تحسین ہے، جس سے ناصرف کئی گھر سنورتے ہیں بلکہ دیگر کمیونٹی سے وابستہ لوگوں کو محبت کا پیغام بھی ملتا ہے۔