پاکستان تحریک انصاف (پی ٹی آئی) کے چئیرمین عمران خان نے محسن رضا نقوی کی بطور نگراں وزیراعلیٰ پنجاب تقرری پر ردعمل کا اظہار کرتے ہوئے کہا ہے کہ مسلم لیگ (ن) اپنے امپائرز منتخب کرنے کی ایک تاریخ رکھتی ہے، لیکن یہ ناقابل یقین ہے کہ کس طرح الیکشن کمیشن نے پی ٹی آئی کے ایک حریف کو نگراں وزیراعلیٰ پنجاب کے طور پر منتخب کیا، وہ عہدہ جو ایک غیر جانبدار شخص کے لیے ہے۔

ٹوئٹر پر جاری اپنے پیغام میں عمران خان نے کہا کہ نقوی نے نیب کے ساتھ پلی بارگین کیا۔

انہوں نے لکھا کہ سپریم کورٹ نے ازخود نوٹس کیس نمبر 17/2016 میں قرار دیا کہ پلی بارگین کی صورت میں کوئی شخص وفاقی یا صوبائی سطح اور نہ ہی کسی ریاستی ادارے میں کوئی عوامی عہدہ رکھ سکتا۔

الیکشن کمیشن نے پاکستان کو بنانا ری پبلک بنانے میں کوئی کسر نہیں چھوڑی ہے، ہماری جمہوریت کو مذاق بنا دیا گیا ہے۔

ان کا کہنا تھا کہ میں کل ایک پریس کانفرنس کا انعقاد کروں گا تاکہ اس پورے قصے کو بے نقاب کیا جا سکے۔