پاکستان تحریک انصاف پنجاب اور خیبرپختونخوا کے بعد اب وفاق کی جانب پیش قدمی کرتے ہوئے وزیراعظم شہباز شریف سے اعتماد کا ووٹ لینے کےلئے حکمت عملی مرتب کررہی ہے۔

ذرائع کا کہنا ہے کہ عمران خان شہباز شریف سے اعتماد کےووٹ لینےکامطالبہ کر سکتے ہیں اور اس مقصد کے لیے صدر مملکت آئین کے تحت وزیراعظم کو ہدایت دے سکتے ہیں۔

آئین کے آرٹیکل 91کی شق 7 کے تحت وزیراعظم کو ہدایت دینے کا اختیار رکھنے والے صدر عارف علوی اعتماد کے ووٹ کیلئے قومی اسمبلی کا اجلاس بلائیں گے۔

آئین کے آرٹیکل 91 کی شق 7 کے بعد قومی اسمبلی قواعد36 متحرک ہوگا۔ وزیراعظم شہباز شریف کو عہدے پر رہنے کے لیے 172 ارکان کی حمایت درکارہوگی۔

صدر کی جانب سے اجلاس بلائے جانے کی سمری کےبعد قومی اسمبلی کا اجلاس قواعدوضابطہ کےتحت ہو گا جس میں اسپیکر اجلاس کی کارروائی کیلئے رائے شماری ڈویژن کا طریقہ کار اپنائیں گے ۔

واضح رہے کہ عمران خان کیخلاف تحریک عدم اعتماد174ووٹ سے کامیاب ہوئی تھی جبکہ شہباز شریف کو اسمبلی سے اعتماد کا ووٹ لینا ہوگا۔