اداکار فیروز خان اوران کی سابقہ اہلیہ علیزے کے درمیان بچوں کی حوالگی اور اخراجات کے کیس میں بچوں کے میڈیکل سرٹیفکیٹ پیش کردیے گئے، علیزے پر تشدد سے متعلق کاغذات کی تصدیق پرسماعت 4 فروری کو ہوگی۔

فیروز خان فیملی کورٹ شرقی میں پیش ہوئے جہاں گزشتہ سماعت میں بچوں کو والد سے نہ ملوانے پرعدالت کی جانب سے طلب کیے گئے میڈیکل سرٹیفکیٹس پیش کیے گئے۔

آج سماعت کے دوران علیزے کے وکیل کی جانب سے عدالت میں کہا گیا کہ فیروز خان چاہیں تو بچوں سے عدالت کے بجائے اپنے گھر میں مل سکتے ہیں۔

علیزے کے وکیل بیرسٹرقائم شاہ نے کہا کہ فیروز خان بیٹے سلطان کو عدالت میں ملاقات والے روزصبح گھر سے لے جا سکتے ہیں، اس حوالے سے فیروز خان کو پہلے بھی پیشکش کی تھی۔

علیزے کے وکیل نے الزام عائد کیا کہ لگتا ہے فیروز خان اپنے بچوں سے ملنے کیلئے سنجیدہ نہیں ہیں۔

عدالت نے درخواستوں پر مزید سماعت 4 فروری تک ملتوی کردی۔

عدالت نے فیروزخان کو بیٹے سلطان کیلئے 50 اور بیٹی فاطمہ کیلئے 30 ہزار روپے ماہانہ اخراجات دینے کا حکم بھی دے رکھا ہے جو ہر ماہ کی 14 تاریخ سے پہلے ادا کرنے ہوں گے۔

فیروز اورعلیزے کے درمیان علیحدگی ہو چکی ہے اور اداکار نے بیٹے سلطان اور بیٹی فاطمہ کی حوالگی کی درخواست دائر کررکھی ہے۔