گورنر پنجاب بلیغ الرحمان نے وزیراعلیٰ کی جانب سے اعتماد کا ووٹ نہ لینے پر تحفظات کا اظہار کیا ہے۔

لاہور میں مختلف وفود سے ملاقات کے دوران بلیغ الرحمان نے کہا کہ گورنر کا آئینی اختیار ہے کہ وہ اسمبلی کا اجلاس بلائے اور وزیراعلیٰ کو اعتماد کا ووٹ لینے کے لئے پابند کرسکے۔

ان کا کہنا تھا کہ وزیر اعلیٰ ایوان کا اعتماد کھو چکے ہیں، آئینی استحقاق کو استعمال کرتے ہوئے پرویز الٰہی کو اعتماد کے ووٹ کے لئے پابند کیا، اگر وہ ووٹ لینے کے قابل ہوتے تو اب تک لے چکے ہوتے۔

گورنر پنجاب نے کہا کہ اسپیکر اسمبلی کو آئینی اختیارات میں مداخلت کا اختیار اور حق نہیں، ان کے اقدامات اور خاموشی غیر آئینی و غیر قانونی ہے جب کہ گورنر کے اقدامات عدالت میں چیلنج کرنا بھی بے بنیاد ہے۔

بلیغ الرحمان نے کہا کہ اسپیکر کے اقدامات اختیارات کی تقسیم کے اُصول کی نفی ہیں، آئین کی اس حد تک نفی اور خلاف ورزی جمہوریت کے لئے خطرناک ہے۔