متحدہ مجلس وحدت المسلمین (ایم ڈبلیو ایم) نے وفد نے عمران خان سے ملاقات کے بعد وزیراعلیٰ پنجاب پرویز الٰہی کو اعتماد کا ووٹ دینے کا اعلان کردیا۔

لاہور میں عمران خان سے ایم ڈبلیو ایم کے سربراہ علامہ راجہ ناصر عباس کی قیادت میں وفد کی ملاقات ہوئی جس میں ملکی سیاسی صورتحال پر تبادلہ خیال کیا گیا۔

ملاقات میں ایم پی اے زہرہ نقوی کے تحفظات پر بھی بات چیت ہوئی، اس دوران ایم ڈبلیو ایم کے تمام تحفظات بھی دور کردیئے گئے جس کے بعد متحدہ مجلس وحدت نے پرویز الٰہی کو اعتماد کا ووٹ دینے اور عمران خان کے ایجنڈے کی حمایت کا اعلان کردیا۔

پی ٹی آئی چیئرمین سے بیٹھک کے بعد میڈیا سے گفتگو کرتے ہوئے ناصر عباس نے کہا کہ ہمیں کسی ملک کی غلامی قبول نہیں، ہماری آزاد خارجہ پالیسی ہونی چاہئے، اس بیانیے پر ہم جان دے سکتے ہیں۔

ان کا کہنا تھا کہ ہم عمران خان کے نظریے کے ساتھ ہیں، ہمارے مسائل ق لیگ کےساتھ تھے جوکہ اب بھی ہیں، ملاقات میں تمام تحفظات عمران کے سامنے رکھے ہیں۔

سربراہ ایم ڈبلیو ایم نے کہا کہ عمران خان نے ہمارے تحفظات دور کرنے کا وعدہ کیا ہے، ووٹ کا مسئلہ نہیں، یہ پی ٹی آئی کی امانت ہے، جس کو کہیں گے ہم ووٹ دے دیں گے۔

خیال رہے کہ گزشتہ دنوں ایم ڈبلیو ایم کی رکن پنجاب اسمبلی زہرہ نقوی نے وزیراعلیٰ پنجاب پرویز الٰہی کو اعتماد کا ووٹ نہ دینے کا اعلان کیا تھا۔