ایڈیشنل ڈسٹرکٹ اینڈ سیشن جج شرقی نے ٹی وی اینکر پرسن ڈاکٹر عامر لیاقت کی نازیبا ویڈیوز وائرل کرنے کے مقدمے میں ملزمہ دانیہ شاہ کی درخواست ضمانت کی ملتوی کردی۔

سٹی کورٹ میں ایڈیشنل ڈسٹرکٹ اینڈ سیشن جج شرقی کی عدالت کے روبرو معروف ٹی وی اینکر پرسن ڈاکٹر عامر لیاقت حسین کی نا زیبا ویڈیوز وائرل کرنے کے مقدمے میں دانیہ شاہ کی درخواست ضمانت پر سماعت ہوئی۔

وکیل لیاقت علی گبول نے استدعا کی کہ ملزمہ کئی ہفتوں سے جیل میں ہے انہیں ضمانت دی جائے۔

ملزمہ کے وکیل ایڈووکیٹ لیاقت گبول نے کہا کہ ایف آئی اے نے تاحال کیس کا چالان جمع نہیں کرایا ہے،کیس کی تفتیشی افسر کے خلاف قانونی کارروائی کی جائے۔

ایف آئی اے کے وکیل کا کہنا تھا کہ کیس کا چالان آج ہی جمع کرادیا جائے گا۔

عدالت نے ملزمہ کی گرفتاری کے بعد 24 گھنٹوں میں پیش نا کرنے پر تفتیشی افسر کو شوکاز نوٹس جاری کیا تھا۔

عدالت نے درخواست ضمانت کی سماعت 12 جنوری تک ملتوی کردی۔

خیال رہے کہ جوڈیشل مجسٹریٹ شرقی نے 23 دسمبر کو دانیہ شاہ کی ضمانت مسترد کردی تھی جس کے بعد دانیہ شاہ عدالتی ریمانڈ پر جیل میں ہیں۔

اس سے قبل جوڈیشل مجسٹریٹ شرقی نے دانیہ شاہ کو 17 دسمبر کو جیل بھیجنے کا حکم دیا تھا اور ایف آئی اے نے دانیہ شاہ کو پنجاب کے علاقے لودھراں سے گرفتار کیا تھا۔

واضح رہے کہ مرحوم ڈاکٹرعامر لیاقت کی بیٹی دعا عامر نے دانیہ شاہ کے خلاف شکایت درج کرائی تھی۔