پاکستان بزنس کونسل نے تیل کی قیمتوں میں کمی آئی ایم ایف سے کیے گئے وعدوں کے خلاف قرار دے دیا ہے۔

پاکستان بزنس کونسل کے مطابق تیل قیمت میں کمی پیٹرولیم ڈیولپمنٹ لیوی کی بحالی کے موقع کو ضائع کرنا ہے، جو آئی ایم ایف سے وعدے کے خلاف ہے۔

مزید کہا کہ سیاسی مصلحت پاکستان کو دیوالیہ کرنے کی طرف لے جا سکتی ہیں، سستا تیل بچت کے بجائے زرمبادلہ میں کمی کا سبب بنے گا۔

واضح رہے کہ حکومت نے آئندہ 15 روز کے لیے پیٹرولیم مصنوعات کی قیمتوں میں کمی کا اعلان کیا، کمی کے بعد پیٹرول 10اور ڈیزل ساڑھے سات روپے فی لیٹرسستا کیا گیا ہے۔

دوسری جانب آل پاکستان پبلک ٹرانسپورٹ اونرز فیڈریشن نے مطالبہ کیا ہے کہ پیٹرول اور ڈیزل کی قیمت میں 50 روپے فی لیٹر کمی کی جائے۔

ترجمان کے مطابق اتحادی حکومت سے امیدیں ختم ہو چکی ہیں، حکومت وزیروں کی تعداد میں کمی کرکے عوام کو ریلیف دے، جبکہ حکومت 8 ماہ میں ریلیف فراہم کرنے میں بری طرح ناکام رہی ہے۔

آل پاکستان پبلک ٹرانسپورٹ اونرز فیڈریشن کے ترجمان نے کہا کہ ڈیزل اور پیٹرول کی قیمتوں میں اضافے کی وجہ سے ٹرانسپورٹ کا کاروبار تباہ ہو چکا ہے۔