وزیر خارجہ بلاول بھٹو زرداری کا کہنا ہے کہ مسئلہ کشمیر اہمیت کا حامل ہے جسے حل کیا جانا چاہیے۔

نیو یارک میں اقوام متحدہ کی سلامتی کونسل کے زیر اہتمام ’پائیدار عالمی امن و سکیورٹی‘ مباحثے میں اظہار خیال کرتے ہوئے بلاول بھٹو نے کہا کہ آج دنیا کو بہت سے چیلنجز کا سامنا ہے، کوپ 27 میں لاس اینڈ ڈیمج فنڈ کا قیام بڑی پیشرفت لیکن عالمی سطح پر قیام امن کے ساتھ سماجی اور معاشی ترقی کا چیلنج بھی درپیش ہے۔

وزیر خارجہ نے کہا کہ عالمی امن و متعلقہ مسائل کا حل سلامتی کونسل کی ذمہ داری ہے، دہشت گردی ہو یا انسانی حقوق کا معاملہ، ہر شعبے میں اقوام متحدہ کا کردار بڑھ گیا ہے۔

ان کا کہنا تھا کہ کسی بھی تنازع کے فریق ملک دو طرفہ معاملہ کہہ کر توجہ نہیں ہٹا سکتے، لہٰذا سلامتی کونسل تسلیم شدہ تنازعات کے حل میں مؤثر کردار ادا کرے۔

بلاول بھٹو نے کہا کہ دیرینہ تنازعات کو سلامتی کونسل کی قراردادوں کے مطابق حل ہونا چاہیے، سکیورٹی کونسل میں توسیع بالادستی کی بجائے برابری کی بنیاد پر ہونی چاہئے۔

مباحثے میں اپنے خیالات کا اظہار کرتے ہوئے وزیر خارجہ نے کہا کہ مزید ملکوں کو ویٹو پاور دینے سے عالمی سطح پر خلیج بڑھے گی، قراردادوں پر عملدرآمد نہ کرنے والے ممالک مستقبل رکن کیسے بن سکتے ہیں، مستقل ممبر کی تعداد میں اضافہ برتر کے طور پر نہیں ہونا چاہیے۔