سانحہ بلدیہ فیکٹری میں نذر آتش کی گئی علی انٹرپرائزز کی عمارت کو مسمار کرنے کا کام جاری ہے، لیکن سندھ بلڈنگ کنٹرول اتھارٹی (ایس بی سی اے) سمیت ضلعی انتظامیہ کارروائی سے لاعلم ہے۔

بلدیہ حب ریور روڈ پر قائم علی انٹرپرائزز کی پلاٹ نمبر 67 کو مسمار کرنے کا کام جاری ہے۔

اسسٹنٹ کمشنر بلدیہ بھی عمارت کی مسماری سے لاعلم ہیں کہ عمارت کون گروا رہا ہے اور کس نے اجازت دی؟

11 ستمبر 2012 کو فیکٹری کو نذرِ آتش کیا گیا تھا، فیکٹری میں ہونے والی آتشزدگی میں 260 افراد جاں بحق جبکہ 600 سے زائد زخمی ہوئے تھے۔

سانحہ بلدیہ کیس میں دو ملزمان کو سزائے موت سنائی گئی تھی، لیکن سزائے موت پر عملدرآمد اب تک نہیں ہوا۔

فیکٹری مالکان کے حوالے کردی گئی تھی، سندھ بلڈنگ کنٹرول اتھارٹی نے عمارت کو مخدوش قرار دیا تھا۔

متاثرین کا کہنا ہے کہ وعدے کے مطابق آج تک متاثرین کی کوئی مدد نہیں ہوئی ہے۔